Ministri i Brendshëm Sandër Lleshaj i ka akorduar ‘Medaljen e Nderit’ efektives Ina Nuka, e cila u plagos gjatë protestës së banorëve të Unazës së Re kundër prishjes së banesave të tyre, në datën 22 nëntor 2018.
Në ceremoninë e zhvilluar në Ministrinë e Brendshme, ku ishin të pranishëm drejtuesit më të lartë të Policisë së Shtetit dhe disa kolegë të repartit “Shqiponja”, ministri Lleshaj shprehu vlerësimin e tij dhe Policisë së Shtetit për përkushtimin e treguar nga efektivja Nuka.
Gjithashtu, ministri i Brendshëm paralajmëroi se do të ashpërsohet masa e dënimit për personat që godasin punonjësit e Policisë së Shtetit në detyrë.
“E kam thënë dhe herë të tjera, që ndjehemi mirë që kemi oficerë policie të tillë që kanë përkushtim, kanë patriotizëm, kanë kurajë, kanë profesionalizëm dhe për këtë arsye kam vendosur që në shenjë mirënjohje t’ju akordojë një “Medaljen e Nderit” të Ministrit të Brendshëm, duke ju thënë që përmes saj shpreh gjithë konsideratat dhe vlerësimin tim si ministër i Brendshëm, por edhe të Ministrisë së Brendshme dhe të gjithë Policisë së Shtetit, për angazhimin tuaj”, u shpreh ministri Lleshaj.
Ndërkohë, Ina Nuka u shpreh se ndihej falenderuese për mirënjohjen dhe se ëndërra e saj vijon të jetë Policia e Shtetit.
