Pas lëkundjeve të tërmetit që u regjistruan ditën e djeshme në Korçë, mbi 90 banorë të fshatit Floq, por edhe të disa zonave përreth e kanë kaluar natën jashtë.
Forcat e Armatosura ngritën 50 çadra, ndërsa banorëve iu është siguruar ushqimi, uji i pijshëm, krevate dhe batanije.
Ditën e djeshme u regjistruan mbi 20 lëkundje pas tërmetit 5.3 ballë, ndërsa ende vijojnë. Mësohet se prej orës 00:35 minuta, deri në 09:00 të mëngjesit të sotëm janë regjistruar 6 lëkundje me magnitudë deri në 3.5 ballë, duke shkaktuar frikë dhe panik te banorët. Epiqendra e tërmetit është fshati Floq.
Mes banorëve te evakuuar ka shumë fëmijë e gra, madje dhe shtatzëna.“U ndjeva shumë keq, jam edhe shtatzënë 7 muajshe. Në këto kushte nuk e përballoj se nuk jam mësuar. Asnjë lloj ndihme nuk kam marrë, kam gjithë ditën në diell dhe në këmbë ngaqë kisha frikë. Nuk jam e sigurt, do ta kaloj natën me frikë”, tha njëra prej tyre.
Ndërkohë, një tjetër banor tregon për “Report Tv”, frikën që kanë përjetuar nga lëkundjet e tërmetit: “Jemi në një gjendje e jashtëzakonshme, llahtari, një tërmet i madh, që nuk e kemi marrë, u bëra 60-vjeç nuk kam parë tërmet të tillë. Nuk kemi ngrënë as bukë asgjë. Shtëpia është bërë gërmadhë, kanë rënë muret.“
