Gjykata e Posaçme kundër Krimit dhe Korrupsionit ka konfiskuar pasurinë e vëllezërve Habilaj, të akuzuar për grup kriminal dhe trafik droge nga Shqipëria në Itali. Gjykata e Posaçme vendosi konfiskimin e pasurisë së Moisi Habilajt dhe familjarëve të tij.
Gjykata e Posaçme ka konfiskuar 22 pasuritë e Moisi Habilajt, i dënuar për trafik droge. SPAK kërkoi konfiskimin e 22 pasurive të familjes Habilaj, në kuadër të ligjit antimafia, pasi janë vënë nga paratë e ardhura nga trafiku i drogës i kryer në Itali dhe Shqipëri. GJKKO ka konfiskuar apartamente, ndërtesa, garazhe, truall, njësi shërbimi, makina dhe pasuri të tjera. Habilaj është përfolur për lidhje farefisnore me ish-ministrin e Brendshëm Saimir Tahiri.
Moisi Habilaj është në arrati, ndërsa është i dënuar edhe në Itali me 15 vite e 5 muaj burg lënë në fuqi edhe nga Apeli atje, por ky vendim nuk u ekzekutua pasi ai u arratis nga banesa ku qëndronte me masë sigurie.
