Apeli i GJKKO-së ka lënë në burg gjyqtaren e Krujës, Enkelejda Hoxhën, e cila u arrestua pak muaj më parë pasi u kap në flagrancë duke kryer korrupsion.
Gjyqtarja ka kërkuar lirimin, duke theksuar se do të kujdeset për fëmijët e saj. Enkelejda Hoxha u arrestua në muajin shkurt të këtij viti, pasi akuzohet se ka liruar të rrezikshmit nga burgu, në këmbim të parave. Hoxha depozitoi një kërkesë, ku kërkoi një masë më të butë sigurie, me arsyetimin e gjendjes shëndetësore të djalit të saj autik. “Kam djalin autik”, mësohet të ketë thënë Hoxha.
Enkelejda Hoxha u vu në pranga paraditen e 11 shkurtit bashkë me 9 persona të tjerë, në kuadër të një operacioni të mirëorganizuar nga SPAK, pasi ishte vënë në përgjim prej muajsh. Më 11 shkurt, Hoxha me skemën e përgatitur me ndihmën e bashkëpunëtorëve të saj, do të lironte të dënuarin për vrasje, Saimir Petani.
Gjyqtarja Enkelejda Hoxha akuzohet se ka marrë shuma nga 6 mijë deri në 12 mijë euro në këmbim të lirimit të të dënuarve për vrasje. Në skemë u zbulua edhe mjeku kardiolog Edvin Prifti, pasi nga përgjimet rezultoi se kishte marrë ryshfet për të operuar në QSUT nënën e sekretares së gjykatës, Manuela Mallkuçi, por më vonë ai u la i lirë.
