Lindita Nikolla u propozua të marrë drejtimin e Kuvendit të Shqipërisë.
Kryeministri Edi Rama e bëri publik emrin e saj në Asamblenë e Përgjithshme të PS-së, ku tha se ajo do të zëvendësojë Gramoz Ruçin.
Në vend të Gramoz Ruçit, Nikolla do të jetë në krye të Parlamentit për 4 vitet e ardhshme.
“Lindita Nikolla e cila besoj se ka mbështetjen e të gjithë anëtarëve dhe simpatizantëve të PS, do të marrë stafetën e Gramozit në krye të Kuvendit të Shqipërisë, si një grua me kontribut dhe përvojë të gjatë në familjen tonë politike.
Si një shembull i përkushtimit dhe ndershmërisë në kryerjen e çdo detyre, një shoqe e mirë dhe politikane karriere që është karakterizuar nga dëshira për dialog me të tjerët”, tha Rama në fjalën e mbajtur në Asamblenë Kombëtare të PS.
