Kryetari i Partisë së Lirisë, Ilir Meta, ka paralajmëruar kryeministrin Rama sa i takon privatizimit të Portit të Durrësit. Në një konferencë për mediat, Meta tha se privatizimi i portit është një skemë e pastrimit të parave e organizuar nga kryeministri Rama. Ai dha sinjalet se zhvillimet do jenë shumë të shpejta. Sipas tij, këtë e dëshmon edhe vetë nxitimi i Edi Ramës, që është kritikuar nga ndërkombëtarët.
“Isha shumë i qartë; do të bëjmë të gjitha veprimet për të parandaluar këtë krim, nga një njeri i marrë peng duke shkatërruar dhe potencialin më të jashtëzakonshëm që ka vendi ynë. Ky projekt asgjeson Portin e Durrësit dhe do të kërkonte një port të ri që do të devijonte trafikun. Pa asnjë diskutim që disponojmë letra. Ashtu thoshit ju dhe për inceneratorët, kur unë nxora letrat. Është Rama. Mos kini shqetësim, zhvillimet do jenë shumë të shpejta. Këtë e tregon dhe vetë nxitimi i Edi Ramës, që është kritikuar nga ndërkombëtarët. Dhe një pallat të ndërtosh, duhet të bësh konsultime, jo për asetin më strategjik të Shqipërisë siç është Porti i Durrësit. Është kafshatë e madhe, do t’u ngec në grykë. Pa asnjë diskutim e kam bërë të qartë, ëndrra e Edi Rama për të ekzekutuar pluralizmin është varrrosur. Shumë shpejt triumfi i demokracisë, i lirisë dhe i qytetarisë do të jetë ngadhjimtar”, tha Meta.
