Paraditen e sotme është mbledhur sërish Komisioni i Ligjeve, ku është rrëzuar dekreti i Presidentit Ilir Meta për kthimin e ligjit për vetëqeverisjen vendore. I pranishëm në Komision sot është edhe këshilltari ligjor i Metës.
Nga ana tjetër, Bashkim Fino, një nga anëtarët e Komisionit të Ligjeve, tha se relacioni i Presidencës është ndërtuar kundër relatorit.
“Ajo që më vjen keq është se po vërej me keqardhje personale se gjithë relacioni është ndërtuar kundër relatorit. Me çfarë duket, Presidenti e ka personale me mua. Presidenti e di si veprohet kur vjen një nismë. Nuk e humbet të drejtën e pronësisë Bashkia. I humbet pronësia vetëm kur shitet. Njësitë vendore janë tërësisht autonome. Duhet ta rrezojmë dekretin e presidentit për këto nene”, tha Fino.
Sakaq, këshilltari ligjor i Presidentit ju përgjigj kësaj kërkese të Finos, se vlerësimi i presidentit bëhet vetëm me ligj.
Disa ditë më parë, Komisioni i Ekonomisë dhe Financave i hapi rrugë koncesioneve të dy segmenteve rrugore, Orikum-Dukat dhe Milot-Balldren, duke rrëzuar dekretet e Presidentit. Bashkë me to rrëzoi edhe tri dekrete të tjera që presidenti Ilir Meta, i ktheu mbrapsht për rishqyrtim, pasi ishin votuar në Kuvend. Dekretet e rrëzuara të Metës janë ato për “Për privatizimin dhe dhënien në përdorim shoqërive tregtare” dhe ligjin për Koncesionet, PPP-të dhe zhvillimin e territorit dhe për ndërtimin me koncesion të segmenteve rrugore Orikum – Dukat dhe Milot- Balldren.
