Kohët e fundit ka pasur një debat të madh në media për prezencën dhe trajnimet e LGBTI-së në shkolla. Jo më larg se sot, ambasadori amerikan Donald Lu ka kritikuar qëndrimin e disa personave publik ndaj këtij komuniteti.
Ndërkohë, ky komunitet ka njoftuar se më 13 maj do të zhvillojë paradën Tirana Gay (P) Ride. Për të shtatin vit radhazi, ky komunitet i mbështetur nga përfaqësues të shoqërisë civile do të marshojë në rrugët e kryeqytetit.
Përkundër debateve të ditëve të fundit, Aleanca LGBT dhe Pro LGBT iu kanë bërë thirrje personave të këtij komuniteti të bashkohen për të pedaluar në paradën e krenarisë më 13 maj para Pallatit të Kongreseve.
Në deklaratën e komunitetit shkruehet, “këtë vit pedalojmë dhe marshojmë krenarë për atë që jemi” duke shtuar më tej se “dashuria nuk ka qenë, nuk është e nuk do të jetë kurrë e gabuar”.
Deklarata e plotë e LGBTI
Gjatë javëve të fundit kemi qenë dëshmitarë të një vale keqkuptimesh dhe mungese të frikshme të informacionit ndaj personave LGBTI.
Këtë vit, ndoshta më shumë se çdo vit tjetër na duhet të bëhemi bashkë, pjesëtarë të komunitetit LGBTI, familjarë, miq dhe njerëz mendjehapur për të pedaluar në Paradën e krenarisë të dielën më 13 maj në orën 11.00 tek Pallati i Kongreseve.
Duhet të bëhemi bashkë edhe për ata të rinj ose jo që nuk mund të jenë aty. Duhet të jemi bashkë për të ndarë me njëri tjetrin mirëkuptim dhe dashuri që aq shumë na duhen këto kohë. Sepse ne besojmë se një ditë do te mund ta bëjmë më të mirë këtë vend, për të gjithë e pavarësisht dallimeve. Dallimet na bëjnë unikë e diversiteti na pasuron. E kjo pasuri nuk rrezikon askënd, vetëm paditurinë dhe mungesën e mirësisë dhe tolerancës.
Këtë vit pedalojmë dhe marshojmë krenarë për atë që jemi; Marshojmë me guxim dhe kurajë për të dashuruar. Dashuria nuk ka qenë, nuk është e nuk do të jetë kurrë e gabuar.
