Dy automjete, të parkuara pranë njëra-tjetrës, janë përfshirë nga flakët pak pas mesnate. Ngjarja ka ndodhur në qytetin e Lezhës, në lagjen Besëlidhja, ndërsa mësohet se një nga automjetet e djegura ishte në përdorim nga kryebashkiaku Fran Frrokaj, i zgjedhur nga PD.
Automjeti tip fuoristradë, Mercedes ML me targë AA 400 JK është në pronësi të shtetases Sh.P. dhe në përdorim nga shtetasi F.F., siç njoftoi Policia e Lezhës.
Sipas policisë, ngjarja ka ndodhur rreth orës 00:45 në parkingun e një pallati, ku janë përfshirë nga flakët dy automjete të parkuara afër njëra–tjetrës dhe konkretisht automjeti Mercedes Fuoristradë ML me targë AA 400 JK në pronësi të shtetases Sh.P. dhe në përdorim nga shtetasi F.F., si dhe mjeti Mercedes Benz me targë LE 7495 E në pronësi të shtetasit K.Ll.
Grupi hetimor po vijon kryerjen e veprimeve në vendngjarje, ku po bëhet kqyrja e kamerave përgjatë rrugës dhe në afërsi të vendit të ngjarjes me qëllim sqarimin e plotë të rrethanave të ngjarjes.
Gjithashtu po bëhet vlerësimi i rastit nga eksperti piroteknik me qëllim përcaktimin e shkakut të rënies së zjarrit.
