Zëdhënësi i qeverisë gjermane, Steffen Seibert, thotë se Gjermania do që të kontribuojë në uljen e tensioneve mes Greqisë dhe Turqisë, për Mesdheun Lindor.
Gjatë një konference për mediat, Seibert tha se kancelarja Angela Merkel ka zhvilluar një bisedë me presidentin turk, Recep Tayyip Erdoğan. Sipas tij, në bisedë u fol për tensionet në Mesdheun Lindor dhe zhvillimet e fundit në Libi.
“Qëndrimi i kancelares Merkel për Mesdheun Lindor nuk ka ndryshuar. Ne duam të kontribuojmë në uljen e tensioneve aq sa mundemi”, tha ai.
Ai theksoi se duan që të nisë dialogu mes Greqisë dhe Turqisë, teksa i bën thirrje palëve që të tregojnë më shumë përpjekje në ditët dhe javët e ardhshme.
“Ne i mirëpresim dhe mbështesim të gjitha përpjekjet që synojnë të eliminojnë pengesat, të ulin tensionet dhe të shmangin rritjen e tensioneve”, shtoi ai.
