Presidenti Donald Trump është shprehur më herët se kur moti të ngrohet, koronavirusi do largohej shumë shpejt. Deklarata e tij është hasur në kundërshtinë e shkencëtarëve, të cilët i kanë dërguar një letër urgjente.
Një panel shkencor prestigjioz i tha Shtëpisë së Bardhë të martën se koronavirusi nuk do të largohet pasi të ngrohet moti. Në letrën e tyre drejtuar Shtëpisë së Bardhë, anëtarët e një komiteti të Akademisë Kombëtare të Shkencave, thanë se të dhënat dëshmojnë një situatë tjetër.
Ata shprehen se ekzistojnë disa prova që sugjerojnë që COVID-19 mund të humbasë efikasitetin në mjedise me temperaturë më të lartë. Por duke marë parasysh mungesën e imunitetit në nivel global, kjo nuk mund të çojë në një ulje të konsiderueshme të virusit.
“Ekzistojnë disa prova që sugjerojnë që koronavirusi mund të humbasë efikasitetin në mjedise me temperaturë më të lartë. Sidoqoftë, duke pasur parasysh mungesën e imunitetit në nivel global, kjo ulje e efikasitetit të transmetimit të COVID-19 nuk mund të çojë në një ulje të konsiderueshme të përhapjes së sëmundjes pa adoptimin e njëkohshëm të ndërhyrjeve kryesore të shëndetit publik”, thuhet në letër.
Në letrën në fjalë sillet në fokus edhe një studim, ku dëshmohet se edhe në kushte maksimale të temperaturës dhe lagështisë, virusi përhapet.
“Duke pasur parasysh që vendet aktualisht në klimë verore, të tilla si Australia dhe Irani, po përjetojnë përhapje të shpejtë të virusit, një rënie e rasteve me rritje të temperaturave gjetkë nuk duhet të supozohet”, thuhet në letër.
