Kryeministri Edi Rama ka dalë në një komunikim live me qytetarët, ku ka folur në lidhje me situatën në vend.
Kreu i qeverisë u shpreh se duke u bazuar në këto ecuri pozitive në bilancin e koronavirusit, mund të mendohet për një lirim të masave shtrënguese.
Rama tha se po konsiderohet lehtësimi i fashës orare apo lëvizjen me automjet të atyre që duhet të paraqiten në punë.
Ai paralajmëroi se kush del për punë dhe merr edhe një tjetër person me vete në makinë, mund të dënohet deri në heqje lirie.
“Bazuar mbi këtë ecuri pozitive kemi mundësi të mendojmë për të liruar me pikatore disa masa, shkallë shkallë, për të lehtësuar psikologjikisht jetën tuaj, por nuk kemi në asnjë mënyrë të drejtë dhe kemi detyrimin të mos hedhim hapa të nxituar.
Ndërkohë dua tu them se nëse do të zgjedhim të fillojmë me disa lehtësime patjetër që duhet të bëjmë edhe disa shtrëngime, se do jemi më të rrezikuar nga ata që nuk duan të dëgjojnë e të kuptojnë që shfaqen aty këtu duke kërcënuar të kthehen në bomba.
Ajo që po konsiderojmë është që duke lehtësuar fjala vjen fashën orare, apo lëvizjen me automjet për punë të të gjithë atyre që janë në një punë, që sot lejohet e që nuk e kanë të mundur të lëvizin të gjithë me automjetin e tyre privat. Duhet të rrisim sanksionet për ata që do e shkelin hapësirën e kufizuar të lirisë, e duhet të shkojmë ndoshta deri në heqje lirie për dikë që merr një automjet për të shkuar në punë dhe e përdor mjetin e tij për të transportuar edhe të tjerë.
Kjo është tani në diskutim në shtabin tonë, pas kësaj do kem një diskutim të gjerë e të gjatë”, tha ai.
