Deputeti i opozitës së re, Lefter Maliqi, në një deklaratë për mediat nga selia e Kuvendit tha se shteti nuk ekziston, pasi krimi është shtrirë në të gjithë vendin. Ai apeloi ndaj të gjithë shqiptarëve që të dalin në protesta, dhe të jenë të vazhdueshme deri në rrëzimin e Edi Ramës. I revoltuar për çfarë po ndodh me vendin, Maliqi shtoi më tej se bandat dhe krimi janë ulur këmbëkryq, ku brenda një jave kanë ndodhur 10 vrasje.
“Lind pyetja: Ka shtet apo jo, ka qeveri apo jo? Po të isha në vend të Ramës do tallesha, do thoja ka dhe do bëja reklama atyre portaleve të bashkëqeverisjes. Por kam parë këto ditë në Berat në Kuçovë dhe në të gjithë vendin, se është një varfëri e madhe.
Unë sot u bëj thirrje të gjithëve që të ngrihen në protesta të vazhdueshme, deri në rrëzimin e qeverisë. Mos ardhtë më si viti 2019, që solli vetëm të këqija. Viti 2019 ishte viti më i zi nga të gjithë vitet që nga 1990.
Shkollat po mbyllen, po ikin njerëzit, po shpopullohet i gjithë vendi. Mijëra shqiptarë po aplikojnë për lotarinë amerikane, këtu nuk ka shpresë. Këtu drejtojnë bandat dhe krimi.
Brenda 7 ditëve kemi parë 10 vrasje, grabitje dhe shteti është në gjumë. Burgjet janë mbushur me të varfër. Dëgjojmë vetëm disa portale dhe show mediatik”, u shpreh Maliqi.
