Si rrallë herë, kryedemokrati Basha ka lënë pas akuzat ndaj qeverisë, ndërsa ka këshilluar qytetarët që të respektojnë distancimin social.
Kjo si një masë për mos përhapjen e koronavirusit vdekjeprurës. Në mesazhin e radhës, kreu i PD-së u kërkon qytetarëve që të ndërgjegjësohen, pasi jemi në kushtet e emergjencës dhe karantinës.
Në këtë formë, Basha i është bashkuar thirrjeve të vazhdueshme të kryeministrit Rama e Ministrisë së Shëndetësisë, për të siguruar jetën e qytetarëve.
Statusi
Të dashur bashkëqytetarë, si shumë prej jush sot dola për disa blerje dhe pashë me kënaqësi respektimin e rregullave te distancimit social.
Ndonëse është një ditë e bukur pranvere, nuk duhet të harrojmë që jemi në kushtet e emergjencës dhe karantinës.
Ndaj dua t’ju përsëris sërish thirrjen time të respektoni të gjitha udhëzimet mbi distancimin social, sidomos kur jeni jashtë për nevojat e ditës! Ruani me fanatizëm distancën 1,5 metër!
E di që për shumë prej jush po bëhet e vështirë, por ju lutem mendoni se në këtë mënyrë po ruani veten, familjen dhe të afërmit tuaj.
Çdo ditë sakrificë për të ruajtur jetën dhe shëndetin është një betejë e fituar. Bashkë do tia dalim. #ditemetemira
