Pasditen e kësaj të marte është ndarë nga jeta ish-futbollisti legjendar i Tiranës, Ali Mema. Një nga portierët më të mirë të të gjitha kohërave me ekipin e 17 Nëntorit (Tirana sot), Ali Mema ka lënë pas kujtime të mëdha për shumë sportdashës, miq dhe ish-futbollistë, në kohën kur ai ka zhvilluar aktivitetin e tij sportiv.
Lajmin për ndarjen nga jeta të një legjende si Ali Mema, e ka dhënë klubi bardheblu me një komunikatë publikuar në faqen zyrtare në facebook. Klubi i Tiranës i shpreh ngushëllime familjes dhe mbi të gjitha djalit të Ali Memës, Ardianit, i cili aktualisht është trajner i Tiranës.
U prehsh në paqe Ali Mema
Është ndarë sot nga jeta Ali Mema, një nga ikonat e familjes bardheblu. Ish futbollist, trajner dhe pjesë e rëndësishme e historisë së klubit.
Ali Mema është ndarë nga jeta në moshën 76-vjeçare pas një sëmundje të rëndë.
Klubi i Futbollit Tirana i gjëndet pranë familjes Mema në ketë moment të veshtirë. I gjithë komuniteti bardheblu ngushëllon trajnerin e Tiranës Ardian Mema për humbjen e babait të tij.
Homazhet do të mbahen nesër, nga ora 10:00 – 12:00 pranë stadiumit “Selman Stermasi”.
Lamtumirë kampion!
