Kreu i Agjencisë Shtetërore të Kadastrës, Artan Lame deklaroi se brenda këtij viti, do të përfundojë regjistrimi i të gjithë pronave në bregdetin e jugut.
Deklarata e Lames u bë mbrëmjen e sotme në një intervistë për News 24. Ai u shpreh se dy ditë më parë, u afishuan dy zona të reja në Lukovë dhe është nxjerrë harta e kësaj zone.
Ai shtoi se i gjithë procesi po zhvillohet në të gjithë bregdetin e jugut. Ndër të tjera, Lame tha se qendrat e qyteteve kanë ndjeshmëri më të madhe dhe duhet të verifikohen nëse ka edhe disa raste kur nuk duhet të legalizohen.
Artan Lame: ”Nuk ka akuza për një rast të vetëm të tjetërsimit të regjistrimit. Këtë e them me krenari. Pardje u afishuan 2 zona të reja në Lukovë. Nxirret harta e Lukovës, e përfunduar, nxirret lista e përfituesve dhe për 45 ditë kanë afat që të kontrollojnë provën dhe pas këtij afati përpunohen dhe lëshohen certifikatat. Kjo po vazhdon në të gjithë bregdetin e jugut. Besoj që nga fundi i vitit mbaron pas 107 vitesh pavarësi, regjistrimi i pronave në bregdetin e jugut”.
