Mbrëmjen e së premtes, një urban u përplas me një automjet, dhe si pasojë e aksidentit të dy përfunduan në Lanë. Pesë persona mbeten të lënduar, pasi një urban i linjës së Unazës në kryeqytet u përplas me një tjetër automjet. Të plagosurit u nisën drejt Spitalit të Traumës, mes tyre shoferi i autobusit, fatorinoja dhe një pasagjere, si dhe drejtuesi dhe pasagjeri që ndodheshin në automjetin tjetër.
Kryetari i Bashkisë së Tiranës, Erion Veliaj dhe Ministrja e Shëndetësisë, Ogerta Manastirliu kanë vizituar sërish në Spitalin e Traumës të lënduarit nga aksidenti i mbrëmshëm në kryeqytet.
Veliaj ka mbajtur premtimin, duke i çuar telefonin njërit prej të plagosurve, që udhëtonte në automjetin e përfshirë në aksident.
“Telefonin e gjetëm, e zgjidhëm hallin e parë”, tha me humor Veliaj, ndërsa i uroi të riut shërim të shpejtë.
“Lali, vetëm celularin kam merak”, i tha i riu mbrëmë kryebashkiakut, për të zhdramatizuar disi situatën.
