Policia e Tiranës ka zbardhur ngjarjen e rëndë që ndodhi mbrëmjen e djeshme në zonën e ish-bllokut në kryeqytet, ku u vra një person dhe u plagosën dy të tjerë.
Dy persona janë arrestuar ndërsa tre të tjerë janë shpallur në kërkim. Përmes një njoftimi zyrtar, policia sqaron se janë vënë në pranga dy të plagosurit, Ervis Martinaj 36 vjeç dhe Eljon Hato 28 vjeç. Të dy këta persona ndodhen në spital jashtë rrezikut, pasi mbetën të plagosur nga shkëmbimi i zjarrit brenda në lokal.
Nga të shtëna humbi jetën 28-vjeçari me iniciale F.G. Ndërsa në kërkim janë shpallur E.M. 31 vjeç, F.A. 42 vjeç dhe M.B. 41 vjeç. Mes këtyre dy grupeve pati një konflikt brenda një lokali, që më pas degjeneroi në përdorimin e armëve duke qëlluar në drejtim të njëri-tjetrit.
Njoftimi
Tiranë
Zbardhet ngjarja e ndodhur mbrëmjen e djeshme ku në një lokal në rrugën “Ibrahim Rugova”, u plagosën me armë zjarri shtetasit E. M., 36 vjeç dhe E. H., 28 vjeç, si dhe mbeti i vrarë shtetasi F. G., 28 vjeç.
Arrestohen në flagrancë dy të plagosurit dhe shpallen në kërkim tre të tjerë.
Sekuestrohen në cilësinë e provës materiale armë zjarri “Glock”, gëzhoja, shumë në euro, automjete e aparate celular.
Grupi i posaçëm hetimor i përbërë nga Specialistë të Taks Forcës Qëndrore, Specialistë të Policisë së Shtetit, Specialistë të Hetimit të Krimeve ndaj jetës dhe pronës në Drejtorinë Vendore të Policisë Tiranë, nën drejtimin e një grupi Prokurorësh të Prokurorisë së Rrethit Gjyqësor Tiranë, bënë arrestimin në flagrancë të shtetasve :
– Ervis Martinaj, 36 vjeç, banues në Tiranë
– Eljon Hato, 28 vjeç, banues në Shkodër
Si dhe u shpallën në kërkim shtetasit:
– Ervin Mata, 31 vjeç, banues në Tiranë;
– Fabio Allushi, 42 vjeç, banues në Tiranë;
– Mevjol Bilo, 41 vjeç, banues në Tiranë;
Këta shtetas mbrëmjen e djeshme në rrugën “Ibrahim Rugova”, janë konfliktuar në ambientet e brendshme të një lokali duke qëlluar me armë zjarri në drejtim të njëri – tjetrit, ku si pasojë e të shtënave mbeti i vrarë shtetasi F. G., dhe u plagosën shtetasit E. M., dhe E. H., të cilët ndodhen në spital nën kujdesin e mjekëve.
Janë sekuestruar në cilësinë e provës materiale :
– armë zjarri tip “Glock”
– 11 gëzhoja
– 10 000 euro
– tre automjete
– aparate celular
Materialet iu referuan për veprime të mëtejshme Prokurorisë së Rrethit Gjyqësor Tiranë në ngarkim të shtetasve të lartpërmendur për veprat penale “Vrasje në rrethana të tjera cilësuese, kundër dy ose më shumë personave e kryer në bashkëpunim” dhe “Prodhim dhe mbajtja pa leje e armëve dhe e municionit luftarak”, të parashikuar nga nenet 79/dh-25, 278 të Kodit Penal.
