Në laboratorin e drogës në Fier janë sekuestruar 430 kg kokainë me vlerë 40 mln euro. Hetimi është ndjekur nga strukturat e Policisë së Shtetit dhe Byrosë Kombëtare të Hetimit (BKH), në bashkëpunim me autoritetet malazeze. Gjithashtu është mbajtur nën monitorim nga DEA amerikane dhe agjenci të tjera ligjzbatuese.
Nga hetimet ka rezultuar se ngarkesa e kokainës ishte porositur në Kolumbi në muajin maj 2022. Kokaina ishte fshehur brenda thasëve me pleh kimik me peshë 24 ton. Më pas, “ngarkesa” me pleh kimik u nis nga Kolumbia në drejtim të Portit të Pireut në Greqi, dhe më pas me destinacion tranzit në Portin e Barit në Mal të Zi. Në këtë port, porosia është marrë nga një shqiptar me kamion. Prej këtej, thasët me pleh kimik që kamuflonin kokainën janë dërguar në një banesë në Farkë të Madhe në Fier. Kjo banesë që shërbente si laborator i kokainës, është në pronësi të ish-kryetarit të Komunës së Frakullës, Viktor Çervanaku.
Gazetari investigativ, Artan Hoxha ka zbardhur detaje të reja, teksa tha se personat e përfshirë në laboratorin e drogës, kanë pasur njohje me administratën shtetërore, dhe se kanë të kaluar në botën e narkotrafikut. Sipas Hoxhës, të bësh marrëveshje për drogë me Kolumbinë do të thotë se grupi në këtë rast ka pasur shuma të mëdha parash të fituara më parë nga trafiku i drogës.
“Personat e përfshirë kanë pasur njohje me persona të përshirë në administratë. Personat që kanë organizuar dhe financuar padiskutim, janë persona që kanë lidhje me botën e narkotrafikut, që nuk e kanë operacion të parë. Ato para i kanë fituar me ngarkesa të tjera. Kolumbianët nuk nisin punë nëse nuk sigurohen se “klienti” ka para dhe e suporton. SPAK tha se ka kapur një nga financuesit.
Deri më tani është Nikolin Gjolena. Sasia e parave është shumë e madhe. Prandaj bëhen 3, 4 operatorë që të minimizojnë dëmin nëse pësojnë goditje. Janë disa financues. Autoritetet tona kanë mbikëqyrur shtetas kolumbianë që kanë ardhur gjatë kësaj kohe. I shpalluri në kërkim kishte hyrë në mënyrë të rregullt në Shqipëri. Kur u ndalua nga policia, nuk u gjet mënyra se si kishte hyrë. E lanë të lirë që ta ndiqnin dhe të zbuluar se ku do i çonte”, tha Hoxha.
