Epidemia e koronavirusit në New Orleans po avancon me ritme aq të shpejta, sa që pritet që ky qytet të jetë epiqendra e ardhshme e sëmundjes në Shtetet e Bashkuara.
John Bel Edwards, guvernatori i shtetit të Luizianës tha se nëse bëhen realitet parashikimet, spitalet në New Orleans do të mbushen tej kapaciteteve brenda javës së ardhshme.
New Orleans është qyteti më i madh i Luizianës, shteti numër tre në Amerikë për nga përqindja e të infektuarve në shkallë popullate, pas Nju Jorkut dhe Uashingtonit.
Por aktualisht New Orleans po shfaq ritmet më të shpejta në botë të përhapjes së infeksionit, duke lënë shumë specialistë të shtangur nga ky fenomen.
Disa mjekë besojnë se problemi erdhi nga Mardi Gras – karnavalet tradicionale për të cilat New Orleans ka famë në botë.
Karnavalet këtë vit ranë më 25 shkurt, kur virusi ishte shfaqur në Shtetet e Bashkuara, por para se të shndërrohej në një problem alarmant për publikun.
Tani po shtohen shqetësimet se qytete të tjera të jugut amerikan do të bien viktimë e epidemisë së shpejti.
Autoritetet po ndjekin situatën në Hjuston, qyteti i katërt më i madh amerikan dhe qendra e rafinerisë së naftës në Shtetet e Bashkuara. Shumë banorë të New Orleans kanë lidhje familjare e shkëmbime të shumta me banorët e Hjustonit. /Voa
