Kreu i Grupit Parlamentar të PS, Taulant Balla, duke iu referuar fjalës së mbajtur një ditë më parë nga Meta, ku vuri në dukje se Kuvendi nuk është funksional, ai iu kundërvu haptazi, duke i kujtuar mungesën e bashkëshortes së presidentit në Parlament.
“Më vjen keq e më duhet ta them që Presidenti e rendit veten në krah të atyre që mendojnë se reforma nuk ka ecur siç duhet, edhe pse nuk ka një partner sot që nuk e vlerëson.
Parlamenti sipas Presidentit nuk qenka funksional. Po pse? Sepse nuk është Monika dhe është Ralfi? Realisht dua t’jua them, le ta shfrytëzojmë këtë kohë të mbetur, të punojmë për Shqipërinë europiane”, u shpreh Balla.
Ai tha më tej se duhet të shfrytëzohet kjo kohë, për të punuar sa më shumë për qytetarët, të cilët edhe i kanë dhënë mandatin. Referuar një teme mjaft të nxehtë, e cila ka të bëjë me zgjedhjet e 30 qershorit, Balla tha prerazi se data nuk do të ndryshojë.
“Zgjedhjet do të zhvillohen, janë një moment Kushtetues. Është afati i fundit Kushtetues për mbajtjen e zgjedhjeve vendore. Kush guxon të dëmtojë procesin zgjedhor, do të përballen me ndëshkimet”, përfundoi Balla.
