Ministrja e Arsimit, Evis Kushi përmes një videomesazhi drejtuar universiteteve dhe studentëve, ka prezantuar rregullat e reja për provimet e sezonit të dimrit.
Kushi u kërkoi universiteteve, që provimet të cilat nuk mund të realizohen online, të zhvillohen në auditore duke respektuar masat kundër koronavirusit.
Sipas saj, në auditore nuk duhet të jenë më shumë se 15 studentë në klasë, dhe provimi nuk duhet të zgjasë më shumë se një orë. Ndër të tjera, ministrja u shpreh se sezoni i provimeve duhet të jetë për një afat 45 ditësh.
Gjithashtu, u jepet e drejta studentëve të cilët nuk kanë mundësi të hyjnë në provimet e këtij sezoni të kenë të drejtën të hyjnë në provime në një sezon të ndërmjetëm.
Evis Kushi: ”Pas një takimi të gjatë me rektorët e Universiteteve i kam dërguar një shkresë Komitetit të Ekspertëve, dua të falenderoj anëtarët e nderuar të komitetit. Besoj fort se ky është një hap pozitiv për të lehtësuar sadopak pasojat e pandemisë së shkaktuar nga Covid 19.
Do të kërkoja nga të gjitha Universitetet, së pari: në ato raste kur është e pamundur që provimi të bëhet online, provimi të bëhet në respekt të rreptë të masave anticovid. Të gjithë studentët që nuk do të marrin pjesë në këtë sezon, tiu ofrohet mundësia që ti bëjnë provimet në një sezon tjetër.
Sezoni i provimeve të jetë për një afat 45 ditësh, së katërti mungesat të mos u penalizojnë studentët oër të hyrë në provime, duke marrë parasysh vështirësitë që ka pasur.
Numri i studentëve në sallë të jetë jo më shumë se 15 persona, provimi të zgjasë jo më shumë se 1 orë, të mbahet me detyrim maska dhe të ketë higjenë të plotë në salla. Secili prej Universiteteve duhet të ketë rregulloren para nisjes së sezonit.’’
