Është e vërtetë, Skënderbeu ka lenë pas emra të mëdhenj të futbollit si Dortmund, Ajax e Lazio. Lajmin interesant korcarët e marrin ndërsa ndodhen në Turqi për mini-fazën përgatitore të dimrit. Instituti i Historisë dhe Statistikave në Futboll ka publikuar renditjen për vitin që lamë pas dhe surpriza është shumë e madhe.
Për Skënderbeun është rezervuar vendi i 47 në botë, duke bërë një hap galopant pasi ka përmirësuar 378 pozicione nga një vit më parë. Kjo është edhe fatura e suksesit që arriti ekipi këtë vit që lamë pas në Europa League, duke u bërë i pari ekip shqiptarë që kalon 4 ture për të arritur fazën e grupeve. Përpos kësaj, Skënderbeu nuk u mposht në asnjë nga ndeshjet që zhvilloi në shtëpi. Për ta kuptuar akoma më mirë, ekipi korçarë lë pas në renditje skuadra të nivelit botëror si Olimpiakos, Lazio, Borusia Dortmund, Ajaksi, Schalke, Cverna Zvezda apo Partizani i Beogradit.
Kompeticioni kontinental sjell natyrshëm rritjen më të madhe, edhe pse në renditje përllogariten edhe koefiçientët në kampionatet përkatës por me një marzh ndikimi më të vogël. Për sa i përket kreut të klasifikimit të vitit 2017 për klubet, në majë qëndron Reali i Madridit, që fitoi Champions League, Superkupën e Europës, La Ligan, dhe Botërorin e klubeve. Gremio kërcen nga vendi i 34 në të dytin, pas triumfit në Kupën Libertadores, ndërsa Manchester United ngjitet në pod duke zënë vendin e tretë falë triumfit në Europa League.
