Svjetlana Tikanovskaja, Veronika Cepkalo dhe Maria Kolesnikova janë tre gratë që kanë bashkuar forcat kundër udhëheqësit të Bjellorusisë, Aleksandër Lukashenko. Ky i fundit ka qëndruar në pushtet për 26 vite.
Svjetlana Tikanovskaja është gruaja e blogerit të njohur, Sergei Tikanovski, i cili nuk mundi ta vazhdonte kandidimin në zgjedhje pasi u arrestua në mars. Ai akuzohet se ka sulmuar një polic, ndërsa në vendin e tij po kandidon Svjetlana.
“Seryozha, të dua shumë. Po e bëj vetëm për ty dhe për njerëzit që të ndoqën e që patën besim te ti”, tha ajo.
Ndërkohë, Veronika Cepkalo është gruaja e Valeri Cepkalos, i cili u largua nga Bjellorusia për në Moskë, nga frika se mos arrestohej pasi iu hoq e drejta për të marrë pjesë në zgjedhje.
Ndërsa, Maria Kolesnikova është përfshirë në fushatën e Viktor Babarikos, të cilit nuk iu lejua kandidimi pasi u akuzua për ryshfet.
Tri gratë janë kthyer në simbol të opozitës, ndërkohë që zgjedhjet priten të mbahen më 9 gusht.
