Ndërkohë që vijojnë hetimet për grabitjen në Rinas, e teksa në pranga janë vënë 4 të dyshuar si të përfshirë në ngjarje, mbetet ende pa përgjigje zyrtare fakti, nëse Admir Murataj u vra nga policia apo nga vetë grabitësit?
Kjo pyetje vazhdon të mbetet pa një përgjigje zyrtare deri në momentin që nuk ka dalë ekspertiza mjeko-ligjore. Por Shemsi Prençi, një ish-zyrtar i policisë jep versionin e tij për ngjarjen e 9 Prillit që ndodhi në Rinas.
“Unë personalisht nuk besoj që e ka ekzekutuar policia. Plaga është shumë e madhe. Ne kemi thënë që grupi i grabitësve kishte fishekë blindëshpues. Plaga që ndodhet në pjesën e djathtë të kokës është plagë shkatërruese. Policia disponon armë që dimë ne, pistoleta dhe kallashnikov. Policia një gjë e di shumë mirë që nuk lejohet të mbajë fishekë blindëshpuese. Gjurma sipas meje mund të jetë me një plumb më të madh nga armët që përdor policia”, tha Prençi.
ICTS Albania, kompania që është e kontraktuar nga Tirana International Airport (TIA) për sigurinë e aeroportit ka punonjës të paçertefikuar. Deklarata është bërë nga Prençi në studion e emisionit Opinion. Po ashtu ai bën përgjegjës dhe dy ish-ministrat e Transportit, sipas të cilit e kanë katandisur situatën e sigurisë në aeroportin e Rinasit në këtë pikë.
“Prokuroria duhet të dijë nga janë punonjësit e ICTS Albania. Kohët e fundit janë marrë nga zona përreth,apo nga Tirana. Drejtuesit marrin rroga të majme dhe luajnë me të punësuarit. Nëse aeroporti ruhet me 50 roje, ata kanë shkruar 125. Çfarë personaliteti kanë këta persona? Këtyre punonjësve duhet t’iu vijë vërtetimi i personalitetit nga Policia e Shtetit. Jam i sigurt që ka një marrëveshje, ku rregullohet mënyra e rekrutimit të punonjësve të ICTS Albania”, tha Shemsi Prençi.
Po ashtu sipas tij për grabitjen ka dështuar dhe SHISH. “Shërbimi Informativ Shtetëror ka strukturë të posaçme mbi mbikëqyrjen e aeroportit. SHISH në asnjë nga grabitjet nuk ka informacion, po ashtu policia nuk ka informacion për paratë. Ngjarja do të zbardhet se ka prova”, tha ai. /Opinion.al
