Punimet në urën kryesore të qytetit të Mitrovicës kanë përfunduar muaj më parë, megjithatë ura nuk është e hapur për qarkullim.
Banorët të cilët jetojnë në jug të Mitrovicës thonë se për të qarkulluar me veturë në anën tjetër të qytetit, ata përdorin rrugët alternative.
“Po normal që na pengon se s’po kemi me vetura si me lëviz po duhet rreth e rreth me dale në atë anë. Me siguri politike. Ma ngatë ma mirë mundësi ma e mirë për neve se sa mu sillë në atë anë”, ka thënë një banor për televizionin publik (RTK).
Nënkryetari i komunës së Mitrovicës së Jugut, Faruk Mujka thotë se autoritetet komunale në pjesën veriore po e mbajnë peng hapjen e urës dhe sipas tij kjo po bëhet më qëllim që të negociohen edhe një herë kufijtë administrativ.
“Po promovohet një finale e dialogut dhe Rakiçi shpreson ta mbajë peng çështjen e urës që të negocioj edhe një herë kufijtë administrativ. Kufijtë administrativ janë të përcaktuar edhe me pakon e Ahtisarit por edhe me Kushtetutën e Kosovës dhe dihet 4 fshatra në veri të Mitrovicës i takojnë Komunës jugore. Intenca e Rakiqit dhe e strukturave serbe është që kufirin ta zbresin deri te shtrati i lumit Ibër dhe në një mënyrë të jetë edhe një kufi natyror dhe shumë më i lehtë për tu administruar sipas projektit të ardhshëm të Asociacionit të Komunave Serbe”, thotë Mujka.
Ndërkaq. asnjë zyrtarë serb në Komunën veriore nuk ka qenë i gatshëm të përgjigjet apo edhe për të bashkëpunuar lidhur me këtë çështje.
Kurse zyra e BE-së në Kosovë thotë se punimet në urë dhe në atë pjesë janë duke vazhduar dhe tani po hyjnë në fazën finale, ndërsa nuk japin datë për hapjen e saj.
