Kryeministri i Kosovës, Albin Kurti ka shpalosur programin e tij qeverisës të mandatit të parë për periudhën 2021-2025.
Në mbledhjen e sotme të ekzekutivit, Kurti njoftoi se qeveria e tij do të përgatisë padinë për genocid ndaj Serbisë, të cilën do ta depozitojnë në Gjykatën Ndërkombëtare të Drejtësisë.
Kurti është shprehur se Prishtina do të bëjë një dialog parimor me Beogradin mbi marrëveshjen e njohjes reciproke mes dy vendeve.
Albin Kurti: ”Do ta përgadisim padinë për gjenocid ndaj Serbisë në Gjykatën Ndërkombëtare të Drejtësisë. Do të bëjmë dialog parimor të përgatitur me Serbinë me marrëveshje të njohjes reciproke”, tha Kurti duke shtuar se këto prioritete do të zbatohen brenda kufijve buxhetor, ndërsa programi qeverisës do të rishikohet çdo fillim vit financiar”.
Dialogu Kosovë-Serbi
Rinisja e dialogut ndërmjet Kosovës dhe Serbisë do të ndodhë gjatë muajit qershor. Kështu u deklarua nga Përfaqësuesi i Lartë për Politikë të Jashtme dhe Siguri i Bashkimit Evropian, Josep Borrell, pas takimit në Bruksel me kryeministrin Kurti në 29 prill.
Kurti konfirmoi se Kosova do të marrë pjesë në rifillimin e dialogut në muajin qershor. Ai tha se dialogu nuk do të neglizhohet nga ana e Prishtinës, mirëpo siç tha ai, ky proces duhet të zhvillohet mbi bazën e parimeve.
Procesi i dialogut Kosovë-Serbi ka nisur në vitin 2011 me bisedimet për çështje teknike, ndërkaq në vitin 2012 kishte evoluuar në bisedime politike për normalizimin e marrëdhënieve ndërmjet dy vendeve, me përfaqësim të nivelit të lartë politik, ndërmjet kryeministrave dhe presidentëve të të dyja vendeve.
Gjatë dhjetë vjetëve të dialogut Kosovë-Serbi, besohet se janë arritur mbi 30 marrëveshje, ndonëse autoritetet në Prishtinë dhe në Beogradi, flasin me shifra të ndryshme për këto marrëveshje.
