Kryeministri i Kosovës Albin Kurti, deklaroi se qeveria e tij nuk ka hequr dorë nga vendosja e masave të reciprocitetit ndaj Serbisë dhe për këtë janë duke u bërë përgatitjet e nevojshme.
Ai i bëri këto komente në parlament pas kritikave të partive opozitare për heqje dorë nga zbatimi i këtyre masave ndaj Serbisë që ishte edhe pjesë e zotimeve të Kurtit para zgjedhjeve të 14 shkurtit.
“Serbia bën përgjithësisht barriera sporadike ndaj mallrave të Kosovës por ka gjithashtu edhe barriera sistemike. Për të zbatuar reciprocitetin për të cilin ne jemi zotuar, kemi nevojë që t’iu bëjmë ballë suksesshëm edhe barrierave sporadike edhe atyre sistemike kjo nënkupton që neve na duhet kohë për t’u përgatitur që ta zbatojmë të plotë reciprocitetin. Është e domosdoshme që ne të përgatitemi që të mos dështojmë në zbatim”, tha ai.
Në mandatin e parë, Kurti vendosi masat e reciprocitetit ndaj mallrave të Serbisë si zëvendësim i tarifave prej 100 për qind që ishin vendosur në vjeshtën e vitit 2018.
Veprimi i tij bllokoi përpjekjet për ripërteritje të bisedimeve me Serbinë duke ngjallur reagimin e bashkësisë ndërkombëtare por edhe ish partnerit të zotit Kurti në koalicionin qeverisës Lidhjes Demokratike të Kosovës, që u bë edhe shkak për rrëzimin e qeverisë së parë të zotit Kurti në muajin mars të vitit të kaluar.
