Dje kryeministri i Kosovës, Albin Kurti, mbërriti në Tiranë në një takim urgjent, ku u takua me Ramën. Kurti ndërpreu një konferencë shtypi në mënyrë të papritur, duke u thënë gazetarëve se ai duhej të largohej për një takim urgjent. Ai mbërriti te vila qeveritare, ku më herët kishte shkuar kryeministri Rama. E ndërsa sot, Kurti ka dhënë detaje nga takimi. Ai ka thënë se ka folur në lidhje me tre çështje me homologun e tij, për sulmet kibernetike, krizën energjetike si dhe procesin e Berlinit.
“E para është siguria kibernetike dhe isha shumë i interesuar të marrë vesh sa më shumë për përvojën e tyre të fundit që kanë qenë të dëmshme dhe kriminale. Ju keni parë që sot kemi themeluar agjencinë kibernetike”.
“Tema e dytë ka qenë sfida e energjisë në ditët dhe javët në vijim, ju e dini se KEK-u dhe KESH-i bashkëpunojnë ngushtë. Ne gjatë verës ju kemi dhënë atyre energji dhe presim që ta kthejnë gjatë dimrit. Konkretisht e njoftova Ramën që ne jemi të parët në Ballkan që kemi marrë vendim për shpërblim të atyre që kursejnë”.
“Tema e tretë ka qenë takimi i Berlinit”, ka deklaruar shkurtimisht kryeministri Kurti.
Ky takim vjen pas tensioneve mes Kosovës dhe Serbisë. Sa i përket nismës “Open Balkan”, Shqipëria dhe Kosova vijojnë të kenë qëndrime të kundërta. Kreu i qeverisë Edi Rama vazhdimisht ka ftuar Kosovën të bëhet pjesë.
