Kryeministri në detyrë i Kosovës, Albin Kurti ka zhvilluar një bisedë telefonike mbrëmjen e djeshme me presidentin francez, Emmanuel Macron.
Zyra e kryeministrisë së Kosovës ka bërë me dije se dy liderët kanë folur rreth pandemisë së koronavirusit, mocionin e mosbesimit që rrëzoi qeverinë Kurti, dialogun dhe tarifën.
Mësohet se Kurti e ka falënderuar Macron për mbështetjen që i kanë dhënë Franca dhe Bashkimi Evropian Kosovës në luftën kundër COVID-19.
“Ndihma evropiane e caktuar për Kosovën filloi me 5 milionë euro dhe do të kap vlerën e përgjithshme prej 68 milionë eurosh. Kurti e informoi presidentin Macron për masat e marra prej Qeverisë dhe rezultatet. Beteja kundër virusit COVID-19 mbetet prioritet i drejtpërdrejtë i Qeverisë në detyrë”, raportohet t’i ketë thënë Kurti Macron-it.
Me tej thuhet se Kurti e falënderoi gjithashtu presidentin Macron për deklaratën e përbashkët franko-gjermane në lidhje me mocionin e mosbesimit në kushtet e tanishme.
Ndërkohë Macron ka shprehur aprovimin për menaxhimin e situatë nga koronavirusi të qeverisë kosovare.
Presidenti francez dhe Kurti folën për dialogun dhe angazhimin përkatës për një përgatitje të vërtetë dhe për një pjesëmarrje të vërtetë të palëve në këtë dialog.
“Në këtë perspektivë, presidenti Macron shprehu mbështetjen e tij për rifillimin e qarkullimit të mallrave mes Kosovës dhe Serbisë. Ai premtoi rritjen e rolit të Francës dhe të atij vetë në lehtësimin e dialogut. Ky do të jetë, sipas tij, edhe synimi i samitit të Parisit për marrëdhëniet Kosovë-Serbi, samit i organizuar nën drejtimin e Francës dhe Gjermanisë, me Bashkimin Evropian, sapo të krijohen kushtet e duhura”, thuhet ndër tjera në njoftim.