Deputeti Myslim Murrizi ka këmbëngulur në dialogun për të ndryshuar dy pikat e Kushtetutës. I mbështetur nga deputetët e tjerë opozitarë, ata kërkojnë ndryshimin e Kushtetutës në dy nene. Kërkesa e tyre konsiston që në zgjedhjet e ardhshme të ketë lista të hapura, dhe të mos lejohen koalicionet parazgjedhore.
Në emisionin “Open”, Murrizi është shprehur i vendosur se do që të hapen listat, ndërsa ka ftuar edhe opozitën jashtëparlamentare që t’i bashkohet nismës. Deputeti tha se nuk do votojë marrëveshjen PS-PD-LSI, pa futur në të listat e hapura apo kërkesat që ka opozita parlamentare.
“Një mundësi të vetme ka që të mos kalojë në Parlament është referendumi. A kanë këllqe këta që të shkojnë te qytetarët? Rama nuk i ka 84 vota. 74 ka, ne i kemi 11. Unë i qëndroj fort listave të hapura. Mes listës së hapur dhe pjesëmarrjes time në Kuvend, unë zgjedh të parën. Kurr mos qofsha në Kuvend, por dua t’ua prish listat e mbyllura. Dua ta ul nga 5% në 2%. Mund të jetë edhe Basha e Mediu dakord që ta ulin. Prandaj unë them hajde ulemi e flasim”, tha Murrizi.
