Çdokush, ka të drejtën e një gjykimi të drejtë dhe të ndershëm. Është një parim që e ka shoqëruar prej shekujsh zbatimin e ligjit. Megjithatë, disa raste në histori, tregojnë se ky parim vlen edhe për kafshët, dhe jo vetëm për njerëzit. Fshatarët e fshatit Autun në Francë, nxorën në gjyq në vitin 1508 një grup minjsh, duke i akuzuar ata për ngrënien e të korrave të tyre.
Minjtë nuk u paraqitën në gjyq, ndërsa avokati i fshatarëve u tha gjyqtarëve se të gjitha krijesat, dhe jo vetëm njeriu, meritonin një gjykim të drejtë. Prokurori kërkoi që ata të dënohen në mungesë. Por në fund, trupi gjykues vendosi që atyre t’u jepet vetëm një “këshillim ligjor”. Kjo për shkak se minjtë do të ballafaqoheshin me keqtrajtimin, nëse gjykata vendoste në favor të fshatarëve.
Juristi Bartolome Shasen, vuri në dukje se gjykata kishte gabuar duke i gjykuar minjtë në grup. Sipas tij, çdo mi duhet të lejohej të merrte pjesë në gjykatë, dhe të kishte avokatin e tij. Në fund gjykata pranoi gabimin dhe pezulloi gjyqin, duke nisur thirrjen e minjve në mënyrë inviduale. Afërmendsh që ata nuk u paraqitën, pasi sipas avokatit, kishin frikë për jetën e tyre.
Gjyqi u shty sërish. Mjerisht nuk ka asnjë të dhënë se si përfundoi ai proces, që sot duket absurd dhe qesharak. Megjithatë, ai rast vazhdoi të përdoret si një precedent për disa gjyqe të mëvonshme me njerëz.
