Kur ligji bie në duart e zuzarëve

Nga: Klodian Tomorri

Kjo foto është tek Prokuroria e Tiranës. Tabela nuk lejon parkim. Por çdo ditë, makinat e banorëve të lagjes parkohen aty dhe në çdo 20 minuta vijnë me radhë policët e Bashkisë, ata të Rrugores dhe u venë gjoba. Por prapë të njëjtat makina parkohen aty. Pse?

Sepse shkenca nuk ka shpikur ende një pajisje, që të bëjë të mundur palosjen e makinave dhe futjen e tyre në xhep. Njerëzit janë vënë në hall nga ligji, sepse ligji ka renë në dorën e zuzarëve. Në atë lagje nuk ka më asnjë vend ku të parkosh. Ka më shumë tabela ndalim parkimi se në gjithë kryeqytetet e Europës të marra së bashku.

Unë nuk e di nëse pas kësaj ka interesa korruptive të Bashkisë. Por natyrshëm kam një pyetje. Sa gjasa ka që banorët e lagjes që parkojnë aty çdo dite nga halli të jenë te gjithë kriminelë dhe shkelës të ligjit, ndërsa Bashkia e Tiranës të jetë në rregull?

Probabiliteti është zero. Nje ligj që i detyron të gjithë qytetarët të bëhen kriminelë, është ligj zuzar. Ata që e imponojnë atë, përfaqësojnë çdo gjë përveçse interesin e qytetarëve.