Mbrëmjen e djeshme, mjeku infeksionist Pëllumb Pipero, iu përgjigj disa pyetjeve të qytetarëve në lidhje me koronavirusin.
“Z. Blendi të lutem pyete doktor Piperon, që sipas mendimit të tij personal kur mendon se mund të përfundojnë masat e marra të karantinës?”, ishte një nga pyetjet.
Pipero tha se nëse qytetarët kanë respektuar me rigorozitet urdhrat e qeverisë, nga java e tretë e prillit me gjasë mund të kemi një ulje të numrit të të infektuarve me COVID-19.
“Nëse qytetarët kanë respektuar urdhrat e qeverisë, nga fillimi i javës së tretë të prillit do fillojnë të zbuten, se kur do hiqen fare nuk e di. Fundi i javës së tretë, fillimi i javës së tretë të prillit do fillojnë të zbuten shumë”, tha mjeku në emisionin “Opinion”.
Mëngjesin e sotëm është regjistruar viktima e tetë nga koronavirusi në Shqipëri. Ministria e Shëndetësisë raporton se një pacient 66-vjeçar nga Fieri, i konfirmuar me Covid-19, pësoi vdekje të papritur (infarkt) në Spitalin Infektiv. 66-vjeçari trajtohej prej dy ditësh në Spitalin Infektiv në QSUT. Pavarësisht ndihmës së menjëhershme të stafit mjekësor, 66-vjeçari që vuante nga sëmundje kronike pulmonare, hipertension, hemorragji gastro-intestinale, nuk arriti të mbijetojë.
Nga ana tjetër, kryeministri Rama ka dhënë një lajm të mirë, teksa konfirmoi se 14 pacientë të tjerë janë shëruar nga koronavirusi.
