Kryetarja e LSI, Monika Kryemadhi, e ftuar në emisionin “Çim Peka LIVE”, është pyetur kur do të organizojë opozita protestën e radhës. Sipas saj, tërmeti i 26 nëntorit dhe pandemia, ka ndikuar në axhendën e opozitës. Ajo tha se ndryshe nga PD, partia që ajo drejton ka një strukturë tjetër. Kryemadhi shtoi se opozita ka një axhendë, ku nuk i lejohet të bëhet asnjë gabim.
“Ne si LSI kemi disa këndvështrime të ndryshme për protestat. Unë kam strukturë tjetër, PD ka strukturë tjetër. Unë jam parti e majtë, jo e djathtë. Në historinë e Shqipërisë, fut edhe 97, edhe 90, sa protesta ka bërë kjo opozitë në 2019 nuk është bërë në të gjithë kohën. Brenda saj ka një menaxhim perfekt të kësaj opozite, që ju duket e paaftë për të rrëzuar këtë qeveri.
Kjo opozitë ka një axhendë, ku nuk do të bëjë asnjë gabim. Djegja e mandateve, mospërfshirja në zgjedhje, tërmeti i 26 nëntorit, pandemia, të gjitha këto nuk kanë qenë axhendë e opozitës. Edhe unë mund të nisem në një shtet tjetër se ngel.
Duhet të jemi shumë të kujdesshëm. Opozita ka edhe një defekt, PR-in, marrëdhëniet me publikun. Duhet të jetë më e organizuar”, tha Kryemadhi.
Do bëni protestë para zgjedhjeve?
Kryemadhi: Do i bëjmë të gjitha ne. Protesta, aksione politike.
Kur ka zgjedhje?
Kryemadhi: Një orë e përpara të bëhen, do të jetë më mirë për shqiptarët. Do të sillte një çlirim të ekonomisë shqiptare. Ne jemi të gatshëm ta mbyllim sa më shpejt reformën zgjedhore, ç’ka sjell edhe zgjedhje të reja.
