Në Europë do të duhen të paktën dy muaj që epidemia të kalojë. Ky është parashikimi i bërë nga Maurizio Viecca, Drejtor i Departamentit të Specialiteteve të Larta në spitalin H.Sacco të Milanos.
Në një intervistë në “Opinion”, Viecca rrëfeu se në Itali nuk u morën masat aq shpejt sa në Shqipëri. Duke bërë një rezyme të situatës, ai është shprehur se epidemia ka arritur thuajse në kulmin e saj në pjesën e veriut të Italisë, ndërsa në qendrën e jugut do jetë në kulmin e saj në një fazë prej disa ditësh. Po Shqipëria në çfarë situate është? Dhe sa pritet që të zgjasë ky izolim? Maurizio Viecca pretendon se nga maji, situata do jetë krejt tjetër.
“Epidemia ka arritur thuajse në kulmin e saj në pjesën e veriut të Italisë, ndërsa në qendrën e jugut do jetë në kulmin e saj në një fazë prej disa ditësh.
Tashmë në veri duhet të fillojë pjesa e rënies, por shenja të mëdha ende nuk jemi duke parë. Por ka disa shenja pozitive, meqe aty ka 15 ditë që janë marrë masa të forta. Edhe periudha e inkubimit është po aq.
Por në Itali nuk u morën masat që u morën në Shqipëri. Aty kur u kuptua problemi, u vendos pa asnjë dyshim se çfarë duhej bërë, duke u kthyer në një model për të gjithë botën. Por në Itali, në Angli, në Francë, Spanjë dhe Amerikë nuk u bë si në Shqipëri, prandaj edhe patën probleme. Nuk e kuptoj se çfarë presin? Por ajo që ka ndodhur, ka ndodhur.
Në Europë kulmin e saj epidemia do dojë së paku dy muaj që të kalojë, ndërsa në Shqipëri besoj se deri në fund të prillit. Përpara fundit të prillit apo fillimit të majit, nuk mund te ktheheni si më parë. Duhet të tregoni shumë kujdes. Sidomos duhet të bëni kujdes me njerëzit që duan të vijnë në Shqipëri. Po aq nga italianët të cilët vijnë në Shqipëri në një numër të madh”.
