Kryeministri Rama është shprehur se vetë Lulzim Basha po e quan marrëveshjen e 18 majit si të vdekur për të justifikuar humbjen e madhe në zgjedhjet e 25 qershorit.
“Ne nuk kemi pasur asnjëherë një marrëveshje se kush do të humbasë apo kush do të marrë çfarë nga zgjedhjet, sepse atë do ta përcaktonte populli shqiptar. Mënyra më e dëshpëruar për të justifikuar një humbje që kishte të gjitha arsyet që të vinte, është kjo mënyrë për të mos pranuar humbjen dhe për t’ju përveshur edhe njëherë tjetër me baltë kundërshtarit pa kursyer Shqipërinë. Nuk është problemi tek çfarë thotë opozita për mua, apo qeverinë, por është se nuk po kursen Shqipërinë në këtë proces”, tha Rama.
Duke folur në “Top Story” Rama ka komentuar edhe akuzat e hedhura në adresë të qeverisë së tij, për lidhje me krimin, por për Ramën këto janë akuza politike. Ai ndërkohë ka nënvizuar se PS ka qenë forca e parë politike në vend, që ka kërkuar dëshmi penaliteti, kjo sipas tij, do të shërbente si një filtër para se të hynte në fuqi dekriminalizimi.
“Akuzat e ngritura kanë qenë politike, sepse filtri ligjor që ekziston sot nuk ekziston sot. Filtri ligjor në atë kohë ishte dëshmia e penalitetit, që PS ishte e para që e ka kërkuar në atë kohë, filtri që u vu është një filtër i ri, jo për problemet e sotme, por për problemet e djeshme me drejtësinë, është një filtër që s’e ka asnjë vend në Evropë siç e kemi ne dhe ne nuk e kemi kundërshtuar dhe madje unë e PS kemi kërkuar që në këtë filtër të hyjnë edhe ata që i shërbejnë administratës së shtetit, jo vetëm të zgjedhurit”-shtoi ai.
Sa i takon kultivimit dhe shpërndarjes së kanabisit në Shqipëri, Rama ka thënë se asnjëherë nuk e kemi mohuar këtë si problem, por ai thotë se ajo që thotë opozita, nuk është zbuluar ndonjë gjë e madhe pasi ne nuk e kemi fshehur si problem
“S’e kemi mohuar kurrë dhe nuk është se ka dalë e vërtetë ajo që tha opozita, sepse opozita nuk ka zbuluar ndonjë gjë që ne e kishim fshehur, thjesht ka komentuar gjërat që ne kemi zbuluar”-theksoi ai.
