Duke qenë se janë shkaktuar tensione të shumta në KZAZ-të e Kukësit, Komisioni Qendror i Zgjedhjeve ka vendosur që të spostojë Komisionet Zonale të Administrimit të Zgjedhjeve në ambiente të administruara nga institucioni i prefektit.
Për KZAZ-në e Kukësit, KQZ ka miratuar me katër vota që Komisioni Zonal i Administrimit të Zgjedhjeve të jetë në një hotel.
Vendimi në fjalë është miratuar me katër votat pro të anëtarëve të zgjedhur nga PS-ja, ndërsa kryetari i këtij institucioni Klement Zguri ka votuar kundër.
“Propozimi i ardhur nga Prefekti i Qarkut plotëson përafërsisht kërkesat e ligjit, është me sipërfaqe 164 metra katrorë dhe në vlerësimin tonë është një sipërfaqe që mund të shërbejë për numërimin e votave. Është propozim i Prefektit të Qarkut për ndryshimin e VNV-së. Për sa kohë Bashkia Kukës ka kërkuar lirimin e ambienteve që janë në administrimin e saj për të mos krijuar konflikt ne kemi menduar që është zgjidhja më e mirë për të shërbyer si vend-numërimi për votat”, tha Sekretari i Përgjithshëm i KQZ-së.
