Ministri i Jashtëm në detyrë, Gent Cakaj, ka reaguar në lidhje me vendimin e Greqisë për t’u zgjeruar me 12 milje në detin Jon. Referuar deklaratave për zgjerimin të gjerësisë së Detit Territorial të Greqisë nga 6 në 12 milje detare, ministri bën me dije se kjo është një çështje që rregullohet nga e drejta ndërkombëtare. Konkretisht nga Konventa e së Drejtës së Detit (UNCLOS) e Montego Bay e vitit 1982.
Cakaj sqaron se Greqia gëzon të drejtën që të zgjerojë gjerësinë e Detit Territorial, aty ku e lejon gjeografia, dhe për sa kohë që nuk cënohen të drejtat sovrane të një shteti tjetër.
Kryeministri grek paralajmëroi nënshkrimin e marrëveshjes për kufijtë detare me Shqipërinë. Duke folur në parlament gjate diskutimit për ratifikimin e marrëveshjeve me Italinë dhe Egjiptin, Kyriakos Mitsotakis tha se Greqia po rritet dhe asgjë nuk e pengon zgjerimin me 12 milje në det.
Statusi
Ministria për Evropën dhe Punët e Jashtme ka ndjekur me vëmendje zhvillimet në Parlamentin grek dhe deklaratat e zyrtarëve më të lartë të vendit fqinj, gjatë seancës së ratifikimit të marrëveshjeve detare mes Italisë dhe Greqisë, si dhe mes Greqisë dhe Egjiptit.
Qeveria shqiptare vlerëson arritjen e marrëveshjeve për delimitimin e hapësirave detare mes vendeve të rajonit të Mesdheut, duke u mbështetur në normat ndërkombëtare për të drejtën e detit dhe frymën e miqësisë dhe interesit reciprok.
Me këtë rast, lidhur me deklaratat për zgjerimin së shpejti të gjerësisë së Detit Territorial të Greqisë nga 6 në 12 milje detare, theksojmë se kjo është një çështje që rregullohet nga e drejta ndërkombëtare dhe konkretisht nga Konventa e së Drejtës së Detit (UNCLOS) e Montego Bay e vitit 1982.
Greqia, ashtu si çdo shtet tjetër palë e konventës, aty ku e lejon gjeografia dhe për sa kohë që nuk cënohen të drejtat sovrane të një shteti tjetër, gëzon të drejtën që të zgjerojë gjerësinë e Detit Territorial sipas parashikimeve të UNCLOS. Vetë Shqipëria në bazë të kësaj konvente ku është palë, ka ushtruar të drejtën për të përcaktuar gjerësinë e detit të saj territorial në 12 milje detare, zgjerim i cili është depozituar pranë Kombeve të Bashkuara që prej 9 marsit 1990 dhe që nuk është kontestuar për asnjë moment nga fqinjët tanë. Kjo e drejtë që buron nga konventa nuk është çështje negociate mes shteteve palë të konventës dhe në të gjitha rastet shtetet që janë në procese negociuese mbi delimitimin e hapësirave detare janë të detyruara që të ndjekin parimet, frymën dhe kriteret e konventës që u njeh shteteve palë të drejtën e zgjerimit të ujërave territoriale deri në 12 milje detare.
Sidoqoftë, qeveria shqiptare do të jetë e vëmendshme për çdo proces legjislativ në vendin fqinj, i cili mund të ketë ndikim në ushtrimin e sovranitetit territorial dhe të drejtave sovrane në hapësirën detare që i takon.
https://www.facebook.com/cakajgent/posts/2705469116389379
