Deputeti Myslim Murrizi tha se është pjesë e grupit parlamentar demokrat. I ftuar në emisionin “Kjo javë” në “News 24”, Murrizi deklaroi se Rudina Hajdari është kryetare e grupit parlamentar demokrat, dhe se ky grup kërkon ndryshim të sistemit zgjedhor. Po kështu ai shtoi më tej se sistemi aktual bën që deputetët të jenë të varur nga kryetari i partisë.
“Jam pjesë e grupit parlamentar demokrat. Ky grup parlamentar udhëhiqet nga znj. Rudina Hajdari. Kemi kërkuar që ditën e parë në atë parlament, ndryshim të sistemit zgjedhor. Duam ndryshim të këtij sistemi zgjedhor, sa më shpejt të jetë e mundur. Sistemi zgjedhor do të ndryshojë se s’bën.
Sistemi aktual bën që deputetët të jenë të varur nga kryetari i partisë. Ata kthehen në kërmij të kryetarit, në lëpirës të kryetarit. Kjo gjë duhet të marrë fund. Nuk duhet më që përfaqësuesit e popullit të jenë ca lëpirës të kryetarëve, por të jenë realisht me popullin”, tha Murrizi.
