Komisioni i Ligjeve po zhvillon ditën e sotme një seancë dëgjimore me Kryeprokuroren e Përgjithshme Arta Marku.
Marku ka prezantuar përpara Komisionit raportin e Prokurorisë për vitin 2018, ku ka bërë një përmbledhje të punës së organit të akuzës gjatë vitit që lamë pas.
Kryeprokurorja u shpreh se ky vit nuk ka qenë i zakonshëm për shkak të zhvillimeve të shumta nga Vettingu, ndërsa shtoi se qarku me kriminalitetin më të lartë është Vlora.
“Prokuroria ka zbatuar të gjitha ligjet në fuqi dhe rekomandimet e Këshillit të Ministrave, rekomandimet e BE, për të shpejtuar rrugën për integrimin e BE. Për vitin 2018 kemi më shumë procedime penale se në vitin 2017. Viti 2018 ka qenë një vit jo i zakonshëm për prokurorët dhe gjyqtarët, për shkak të procesit të Vettingut. Prokurorët kanë qenë disi apatik, pasi në mënyrë të pashmangshme ka ndikuar në punën e tyre.
Një pjesë e procedimeve janë nisje nga Prokuroria, ndërsa më shumë janë referime nga qytetarët dhe policia. Gjithsej, janë bërë më shumë se 57 mijë procedime. Më shumë procedime penale janë shënuar në Tiranë, më pas në Durrës, Elbasan, Shkodër. Përqindja më e ulët e kriminalitetit është në qarkun e Dibrës, kurse më të lartë e ka qarku i Vlorës. Veprat penale më të lartë janë vjedhja e pasurisë, krime ndaj personit, krimet ndaj tokës, veprat e dhunës kryesisht në familje. Në 2018, janë dënuar më shumë se 10 mijë persona”, tha Arta Marku.
