Ana Brnabiç, kryeministrja e sapozgjedhur serbe, ka komentuar çështjet politike në Kosovë. Ajo ndër të tjerash në një intervistë për Blic është pyetur se kush do të ishte më mirë që për Serbinë të zgjidhej kryeministër në Kosovë, kandidati Ramush Haradinaj apo Albin Kurti.
Brnabiç ka deklaruar se Kosova është një pjesë integrale e Serbisë dhe sipas saj nuk ka rëndësi se kush do të marrë udhëheqjen e Kosovës pasi do të jenë të gatshëm të flasin me këdo që përfaqëson palën tjetër, në këtë rast shtetin e Kosovës.
“Albin Kurti apo Ramush Haradinaj, Kosova është pjesë e Serbisë dhe si partnerë të ndërgjegjshëm ne do të flasim me të gjithë që e përfaqësojnë palën tjetër”, ka thënë Brnabiç.
Brnabiç ndër të tjerash është pyetur edhe rreth dialogut në mes Prishtinës dhe Beogradit e cila ka deklaruar se është e gatshme për të vazhduar këtë dialog, raporton indeksionline.
“Në qoftë se ka nevojë për të shkuar, unë do të shkoj. Kjo është pjesë e punës sime. Por sipas Bashkimit Evropian do të ishte më mirë që niveli i bisedimeve të vazhdojë në nivel presidencial, për shkak se Thaçi dhe Vuçiç deri tani kanë marrë pjesë në dialog. Unë mendoj se kjo do të ishte zgjedhje e mirë”, ka shtuar Brnabiç
