Presidenti i Kosovës Hashim Thaçi ka reaguar pas deklaratës së kryeministres serbe se shqiptarët janë “njerëz që vijnë nga mali”.
Sipas Thaçit, gjuha e përdorur nga Ana Bërnabiç, është një tjetër dëshmi e urrejtjes patologjike të regjimit aktual të Serbisë kundër qytetarëve të Kosovës.
Ndër të tjera, Thaçi kërkoi nga BE të dënojnë “gjuhën raciste” që përdorin zyrtarët e Serbisë, që sipas tij stimulojnë urrejtje, duke minuar përpjekjet për pajtim dhe normalizim.
“I jashtëzakonshëm dhe zhgënjyes për ne është vetëm fakti i hidhur që BE-ja nuk e dënon këtë sjellje raciste dhe antievropiane të Serbisë. Përkundrazi, BE-ja vazhdon t’i mbajë dyert e hapura për një shtet që ka kryer gjenocid dhe që nuk beson në vlerat evropiane as sot”, deklaroi Thaçi.
Gjithashtu dhe Pacolli i ka dërguar një porosi kryeministres së Serbisë, se ajo nuk do të mund të hyjë në Kosovë për sa kohë ndjek një ideologji raciste dhe të sëmurë kundër popullit të Kosovës dhe etnive që jetojnë këtu.
