Kryeministri Edi Rama, në një dalje publike dje në emisionin “Opinion” i ka dhënë përgjigje apelit të dy sportistëve elitarë, Briken Calja dhe Izmir Smajlaj, të cilët prej ditësh kanë kërkuar publikisht zbatimin e VKM për sportin. Ata i kanë kërkuar kryministrit që të shpërblehen për medaljet dhe të punësohen në strukturat e Ministrisë së Mbrojtjes ose të Brendshme ashtu siç e parashikon VKM.
Kryeministri pasi ka dëgjuar kërkesat e tyre ka bërë me dije se shumë shpejtë të dy do të jenë pjesë e strukturave të Ministrisë së Brendshme. “Faleminderit për komplimentin që më bëri, por unë s’do kisha shans t’i kërkoja këto, se nuk do dilja as kampion Europe, as kampion Bote. Për rastin e Brikenit, ka një kuadër shumë të qartë ligjor. Nuk e kemi shpikur ne, është i komitetit olimpik. Brikeni e ka marrë shpërblimin. Nëse del pa problem nga antidoping, do të marrë dhe shpërblimin tjetër, por, shpërblimet jepen për medaljen e artë. Ai ka dalë kampion në shkëputje, por jo në shtytje. Ndërkohë që shpërblimi jepet për medaljen që i korrespondon vendit të parë. Kështu funksionon në të gjithë botën. Për sa i përket punësimit, për të 2 është në proces punësimi në Ministrinë e Mbrojtjes. Të dy do të jenë kontingjent i ministrisë së mbrojtjes. Çfarë kemi bërë ne për sportin në 6 vjet, nuk i kanë bërë të gjitha qeveritë. Unë nuk kam shkop magjik”, u shpreh Rama.
