Kryeministri i Kosovës, Ramush Haradinaj fiton më shumë nga shtëpia e dhënë me qera sesa prej rrogave shtetërore. Familja Haradinaj ka kohë që nuk jeton në shtëpinë e ndërtuar në lagjen “Dragodan”. Sipas deklarimeve të familjes Haradinaj, shtëpia është ndërtuar me kursime të familjes dhe me ndihmë nga bashkëluftëtarët. Ajo shtëpi ka një vlerë prej 300 mijë eurosh.
Haradinaj tani jeton në një tjetër shtëpi luksoze në lagjen “Marigona Residence” ndërsa shtëpinë në Dragodan e ka të lëshuar me qera.
Sipas deklarimit të pasurisë në Agjencinë Kundër Korrupsionit në Kosovë, Haradinaj merr 6 mijë e 679 euro në muaj nga qiraja e kësaj shtëpie. Ndërsa të ardhurat që merr nga rrogat nuk i kalojnë 5 mijë euro në muaj.
Po të bësh mbledhje janë fiks 73 mijë e 469 euro është shuma totale që Haradinaj merr në vit nga qiraja e kësaj shtëpie, por siç ka raportuar media, Haradinaj nuk e ka paguar tatimit nga të ardhurat e qerasë.
Kryeministri ia ka borxh shtetit të Kosovës afro 15 mijë euro tatim nga qiraja e shtëpisë.
Ai i ka borxh shtetit ose më saktësisht, Administratës Tatimore afro 15 mijë euro të cilat janë detyrime të paguara për 11 qera gjatë vitit.
Haradinaj ka thënë se arsyeja e mos pagesës së këtij tatimi, qëndron tek fakti se nga 12 qeratë e 12 muajve të vitit, një qera i takon agjencisë që ka ndërmjetësuar në këtë qera.
