Greqia është ndër vendet që ka patur shifrat rekord të të infektuarve, dhe të të vdekurve nga virusi. Pavarësisht masave të marra, duket se situata nuk ka njohur përmirësim. Por kryeministri grek ka kërkuar nga qytetarët që të durojnë edhe pak, pasi vaksina do të jetë pranë tyre në muajin janar. Kryeministri Kyriakos Mitsotakis, në fjalën e tij në Kuvend tha se në muajin janar do të kenë gati vaksinat, ndaj qytetarët duhet të mos anashkalojnë masat.
“Sot nuk ecim pa drejtim. Duhet të shtrëngojmë dhëmbët për të arritur deri në fund. Ne do të kemi vaksina nga janari. Dozat do të vijnë në pjesë dhe qytetarët do të duhet të vaksinohen në mënyrë që të thyejnë zinxhirin e pandemisë. Do të kapërcejmë vështirësitë dhe do të dalim fitimtarë me sa më pak lëndime, në mënyrë që viti 2021 të jetë viti i rifillimit”, ka thënë Mitsotakis.
Ai ka paralajmëruar po kështu se javët e ardhshme do të jenë të vështira. “Javët e ardhshme do të jenë të vështira. Ato janë gjithashtu të vështira për bashkëqytetarët tanë që punojnë, të cilët po përballen me pasoja ekonomike.
Kjo është arsyeja pse ne thamë që posaçërisht për nëntorin do të dyfishojmë kompensimin në punën e paguar, dhe do ta sjellim atë në 800 euro. Ne do të mbështesim familjet më të rrezikuara”.
