Kryetari i Partisë Demokratike, Lulzim Basha ka publikuar një video në të cilën thekson se përgjatë 8 viteve qeverisje nga kryeministri Edi Rama, Shqipëria ka regjistruar papunësinë më të lartë në histori.
Sipas tij, Rama nuk e sjell dot ndryshimin sepse ai është problemi, dhe shprehet besimplotë se më 25 prill e gjithë Shqipëria do të votojë Partinë Demokratike.
“Per 8 vite me Ramën, Shqipëria regjistroi papunësinë më të lartë në histori. Ai nuk do të sjellë dot kurrë ndryshim. Ai është problemi. Më 25 Prill – e gjithë Shqipëria voton 9, për punësim, për ndryshim!”, shkruan Basha krahas videos në rrjetin social, Facebook.
Ditën e djeshme, kryeministri Rama i bëri ftesë publikisht Bashës për të bashkëpunuar pas zgjedhjeve të 25 prillit, por kishte një kusht.
Ai kërkoi shkëputjen e tij nga Presidenti Ilir Meta dhe ish-kryeministri Sali Berisha, mirëpo Basha e ka refuzuar duke thënë se Rama nuk do të bëhet kurrë pjesë e qeverisë së tij.
