Kryeministri italian, Giuseppe Conte, është shprehur se shkollat në Itali do të rihapen më 14 shtator.
Gjatë një konference për shtyp, Conte tha se qeveria ka vënë në dispozicion një miliard euro shtesë për investime të mëtejshme në shkolla.
Direktivat e Ministrisë italiane të Arsimit parashikojnë një sërë masash për të parandaluar përhapjen e koronavirusit, si: hyrje dhe dalje me radhë, klasa të veçanta për grupmosha të ndryshme nxënësish, orë mësimore 40-minutëshe në vend të 60, pjesërisht arsim në distancë, etj.
“Shkollat do të rihapen në këtë datë me një sërë masash, që supozohet të garantojnë distancimin shoqëror dhe sigurinë maksimale. Shkolla është në qendër të politikës së qeverisë. Qeveria ka punuar shumë me botën e arsimit në tërësi, për të përcaktuar udhëzime për rihapjen e shkollave.
Ne jemi më të përgatitur me udhëzimet, për t’u kthyer më të sigurt në shtator. Kemi vënë në dispozicion një miliard euro shtesë për investime të mëtejshme në shkolla, të cilat do të na lejojnë të kemi një shkollë më moderne, më të sigurt dhe gjithëpërfshirëse. Dhe në Fondin e Rimëkëmbjes, një kapitull i rëndësishëm do t’i kushtohet ndërhyrjeve në shkolla.
Mbyllja e shkollave ishte një zgjedhje shumë e dhimbshme dhe askush të mos mendojë se qeveria e pati të lehtë ta merrte. Ne duam klasa më pak të mbushura, nuk tolerojmë klasat e tejmbushura me nxënës”, tha kryeministri italian.
