Ka përfunduar takimi mes liderëve të dy partive më të madhe opozitare, Lulzim Bashës dhe Monika Kryemadhit. Kjo e fundit, ka folur për mediat pas këtij takimi, ku deklaroi se parlamenti nuk mund të quhet legjitim për sa kohë nuk i ka 140 deputetë.
“Ndodhemi në kushtet e krizës institucionale, parlamenti s’mund të funksionojë pa 140 deputetë, nuk i ka këta deputetë që të quhet legjitim”, tha kryetarja e LSI-së.
E pyetur nëse është e gatshme të dialogojë për zgjidhjen e krizës politike, Kryemadhi u tregua e prerë ashtu si Basha, teksa tha se nuk ka më dialog, ndërsa sipas saj edhe socialistët po përgatiten për zgjedhje. Madje, ajo shkoi më tej, teksa deklaroi se zgjedhjet parlamentare do të mbahen para atyre lokale.
“Nuk ka më dialog. Të shkojmë drejt zgjedhjeve, socialistët po përgatiten për të shkuar drejt zgjedhjeve të parakohshme. Vera do fillojë më zgjedhje parlamentare, jo lokale.
Do ta bëjnë të tjerë që ka brenda zoti Rama, socialistët kanë ndërruar kryeministra dhe ministra për të ruajtur PS-në, elementët brenda do të çojnë drejt kësaj gjendje. Do shpërthejë, para 2 ditësh isha në Roskovec dhe e shikoja se si njerëzit shkumëzonin nga urrejtja e kryetares së bashkisë që përveç se i kishin grabitur, bashkia e Roskovecit është kthyer në një lavatriçe parash.
Njerëzit thanë, tashmë nuk ke ca gjaku t’i pish këtij populli. Ka arritur në atë stad saqë njerëzit kanë vetëm helm ndaj kapjes së shtetit”, tha ndër të tjera Kryemadhi./ Tirana Today
