Kryetarja e LSI-së Monika Kryemadhi, ka hedhur akuza të shumta, në drejtim të kryeministrit Edi Rama, i cili sot në Kryesinë e Kuvendit, mblodhi grupin parlamentar të PS-së, ku ndau me ta zhvillimet më të fundit lidhur me integrimin në BE, duke theksuar se vendi ynë është vetëm një hap larg çeljes së negociatave.
Gjatë fjalës së tij në nisje të mbledhjes, kryeministri Rama i bëri thirrje opozitës për dialog për çështjen e negociatave me BE-në dhe jo vetëm.
Kryemadhi, u shpreh se i vetmi që po pengon integrimin e vendit në BE është vetë kryeministri.
“Nesër do të jemi më shumë, se protesta sapo ka nisur, beteja e parë drejt një lufte pa kthim deri në rrëzimin e klikës. Falënderoj policët që bënë detyrën dhe nuk u bënë pre e provokimeve të qeverisë që tentonin të provokonin turmën, ashtu si dënon ata policë që ndaluan dhe mbajtën me orë të tëra protestuesit nëpër rrugë. Falënderoj mediat, falënderoj grupin organizator që e realizuan me sukses. Protesta nuk është thjesht një parakalim para godinës ku gatuhet krimi në vend, por për ti treguar Ramës dhe atyre që e mbajnë atë se sapo ka filluar beteja për ta rrëzuar atë. Nuk është në dorë të opozitës, por që e bën gjithë populli kundër varfërisë, pabarazisë, krimit, emigracionit, klikës që po i varfëron. Protesta e ditës së shtunë është fillimi. E them këtë pasi fundi nuk i dihet. Axhendën e opozitës nuk e bën më opozita por shqiptarët. Kjo protestë nuk do të ndalet më. Sot shqiptarë kanë vrarë frikën, sot shqiptarë mendojnë dhe e dinë shumë mirë, se kush është me e keqja e vendit. Ata e dinë se Edi Rama dhe krimi i organizuar po mbajnë peng vendin, dhe nuk po e lejojnë të integrohet”, tha Kryemadhi.
